បន្ទាយមានជ័យ៖ សាច់ជ្រូក និងគ្រឿងក្នុងជ្រូក៦២១គីឡូក្រាម ដែលមន្ត្រីជំនាញត្រួតពិនិត្យក្នុងរថយន្តមួយគ្រឿង នៅភូមិទឹកថ្លា សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ កាលពីនៅថ្ងៃទី១៨ ខែមីនា ឆ្នាំ២០២៤ គឺពុំមានឯកសារពាក់ព័ន្ធនឹងការនាំចូល គ្មានសំបកវេចខ្ចប់ ការដឹកជញ្ជូនមិនមានស្តង់ដារត្រឹមត្រូវឡើយ។
ក្រោយត្រួតពិនិត្យមន្ត្រីជំនាញបានដកហូត និងបានយកទៅដុតកម្ទេចចោល និងបានចាត់វិធានការផ្លូវច្បាប់ល់ម្ចាស់ទំនិញផងដែរ។
សាច់ជ្រូក និងគ្រឿងក្នុងជ្រូកដែលដុតបំផ្លាញចោលរួមមាន អណ្តាតជ្រូក ចំនួន ១៨៦គីឡូក្រាម ពោះវៀនជ្រូក ចំនួន ១៤៥គីឡូក្រាម ជើងជ្រូក ចំនួន ៨៧គីឡូក្រាម ត្រចៀកជ្រូកចំនួន ៣៨គីឡូក្រាម បេះដូងជ្រូក ចំនួន ១៣គីឡូក្រាម ក្រពះជ្រូក ចំនួន ៦០គីឡូក្រាម ឆ្អឹងជំនីជ្រូក ចំនួន ៦៥គីឡូក្រាម ថ្លើមជ្រូក ចំនួន ២៧គីឡូក្រាម។
កាលពីថ្ងៃទី១៤ ខែមីនា ឆ្នាំ២០២៤ មន្រ្តីជំនាញ ក.ប.ប.ខេត្តបន្ទាយមានជ័យក៏បានដុតបំផ្លាញចោលប្រហិតចម្រុះ ភ្លៅមាន់ គ្រឿងក្នុងមាន់ សាច់មឹក និងក្រញាំមាន់បកក្លាសេប្រមាណជាង ៩០០គីឡូក្រាមដែលខូចគុណភាពផងដែរ៕
